Բողոքարկելուց հետո միայն պարզվեց, որ վարորդը ամենևին էլ տաքսիների կայանատեղիում չէր կայանել

Հարգելի՛ ընթերցողներ, սիրով ուզում ենք տեղեկացնել, որ արդեն մեր շարքերում ունենք վարորդներ, ովքեր ինքնուրույն, առանց «Վարորդի Ընկեր» ԻՀԿ աջակցության, կազմում են վերադաս բողոք, ուղարկում ՃՈ  և հասնում հաջողության: Այս անգամ իր փորձով մեր հետ կիսվել է «Ճանապարհային ոստիկանություն և կարմիր գծեր» ֆեյսբուքյան խմբի անդամ Հայկ Մելքոնյանը, ով անձնամբ կազմել է վերադաս բողոք և դիմել ՃՈ, ընդ որում, վերադաս բողոքն ուղարկել է ոչ թե փոստային ծառայության միջոցով, այլ էլեկտրոնային փոստով: Վարորդն ունեցել է բողոքարկելու մի քանի պատճառներ: Նախ, նա պարզապես հետաքրքրության համար իր տվյալները որոնել է www.azdarar.am կայքում և հանկարծ պարզել, որ Հարկադիր ծառայությունում իր նկատմամբ կատարողական վարույթ է հարուցվել, թեև նա երբևէ չի ծանուցվել վարչական տույժ նշանակվելու մասին: Դա դեռ բավական չէ,  խախտում էլ անհիմն է և խեղաթյուրված: Իբրև թե մեքենան կայանել է տաքսիների համար նախատեսված վայրում, այնինչ այդ մասին չկա ոչ մի ցուցիչ կամ թելադրանքի նշան: Իսկ որպես ապացույց ներառված տեսանյութն ընդամենը 44 վայրկյան է, ինչը չի գերազանցում ՎԻՎ օրենսգրքով թույլատրելի 1 րոպե ժամանակահատվածը: Ահա վարչական տույժ նշանակելու մասին որոշումը. PIN# 16689FXEKLMN:
Այս բոլոր հանգամանքները ստիպել են Հ. Մելքոնյանին վերադաս բողոք ներկայացնել Ճանապարհային ոստիկանություն և պահանջել անվավեր ճանաչել կայացրած որոշումը:

Բնականաբար զարմանալի չէ, որ ՃՈ-ն բավարարել է վարորդի պահանջը և բեկանել իր կողմից սխալ կայացրած որոշումը, բայց զարմանալի է, որ չի պարզաբանել վարորդի հիմնավորումները և բացատրություն ներկայացրել: Բեկանման որոշումը կցվում է:

Բացի այդ,  հարկ ենք համարում նշել, որ համաձայն ՀՀ կառավարության 2006 թվականի հոկտեմբերի 26-ի N 1699-Ն որոշման Հավելված N3-ի 52.22.-կետի՝ «5.16 «Ավտոբուսի և (կամ) տրոլեյբուսի կանգառի տեղ», 5.17 «Տրամվայի կանգառի տեղ», 5.18 «Թեթև մարդատար տաքսիների կանգառի տեղ» նշանները կիրառվում են սահմանված երթուղով երթևեկող տրանսպորտային միջոցների համապատասխան տեսակների և թեթև մարդատար տաքսիների կանգառի կետերը նշելու համար: Նշանները պետք է լինեն երկկողմանի: Որոնք էստ էության չեն կահավորվում և ցավալի է, որ վարչական մարմինն այդ հարցին չի անդրադառնում:

Ինչևէ, հուսանք նման իրազեկված և սեփական իրավունքների համար պայքարող վարորդների քանակն օրեցօր կավելանա: